Nerisaqarnermut siunnersuisoqatigiit 2010-mi qitiutillugit samminiagai
Nerisaqarnermut siunnersuisoqatigiit ukioq manna naggataarlutik PAARISA-mi katersuummata pisarnertut uummaarissumik oqallittoqarpoq. Nerisaqarnermut siunnersuisoqatigiit 2010-mi nerisassat peqqinnartut akii, timimik aalatitsineq aammalu piareersaatitut sammisaq "Atuarfinni aamma atuareersunut paaqqinniffinni nerisaqartitsineq nerisarnerlu pillugit politikki" qitiutillugit samminiarpaat.
Kalaallit Nunaanni nerisassat akii Danmarkimi nunanilu avannarlerni akinut naleqqiukkaanni, Kalaallit Nunannani nerisassat peqqinnartut toqqassagaanni pitsaasumik aningaasaqarnissaq pisariaqarpoq. Nerisaqarnermut siunnersuisoqatigiit ukiumi nutaami nerisassat peqqinnartut akii pillugit ajornartorsiutit annertunerusumik qitiutinniarpaat, taakkumi siunnersuisoqatigiit isumaat malillugu innuttaasut akornanni peqqinnartumik nerisarnermut atatillugu assigiitsoqarneranik pilersitseqataammata.
Nerisaqarnermut siunnersuisoqatigiit 2008-mi nerisaqarnermut innersuussutit pillugit misissuititsinerani, najukkani assigiinngitsuni nerisaqarnermut innersuussutit qulit malinneqarsinnaanerat qulaajarneqarpoq. Misissuinerup inaarneqarnerata nerisassat peqqinnartut toqqassagaanni aningaasaqarniarneq pingaaruteqartumik aalajangiisuusoq tikkuarpaa.
Nerisaqarnermut Siunnersuisoqatigiit aamma 2010-mi timimik aalatitsineq immikkut suliniuteqarfiginiarpaat. Siunnersuisoqatigiit 2010-mi ukiakkut SILA'p "Nerisassat, timi aamma kulturi" sammineqartillugu immikkut saqqummersinneqarnissaa aalajangiuppaat. Ilaatigut atuarfinni anitsiartarfinni pinnguaatit pitsaasut nuannersullu nassaarineqarnissaat imaluunniit nassaarineqaqqinnissaat pillugu unammisitsisoqassaaq, aammalu nerisassat timersortarfinni imaluunniit timersornermut atatillugu neqeroorutigineqartartut pitsaassusaat qitiutinneqassaalluni.
Nerisaqarnermut Siunnersuisoqatigiit 2009-mi PAARISA suleqatigalugu piareersaatitut sammisaq "Atuarfinni aamma atuareersunut paaqqinniffinni nerisaqartitsineq nerisarnerlu pillugit politikki" pillugu suliaq aallartippaat, taanna ilinniartitisunut, atuartut sinniisaannut aamma perorsaasunut pikkorissarnissamik neqeroorutaavoq. Tassani peqataasut namminneq atuarfimminni imaluunniit sullivimminni nerisaqarneq aamma nerisaqartitsineq pillugu politikkiliornissaminnut oqallisilernissamut oqaasertalersuinissaminnullu sakkussanik tunineqarnissaat siunertarineqarpoq.
Decemberimi pikkorissaaneq siulleq inunnit 27-init peqataaffigineqartoq ingerlanneqarpoq. Peqataasut Kommuneqarfik Sermersuup kitaani atuarfinnit atuareernermilu paaqqinniffinniit sinniisuupput. 2010-mi upernaakkut pikkorissaanermut tassunga assingusoq Tunumi neqerorootutigineqassasoq pilersaarutaavoq.
Pikkorissaaneq ulluni tallimani ingerlanneqarpoq, tassani peqataasut atuarfimminni imaluunniit sullivimminni nerisaqarneq aamma nerisaqartitsineq pillugu oqallittoqassagaangat piviusuusaartitsinerit sungiusaatillu atorlugit sakkussanik atorsinnaasaminnik tunineqarput. Pikkorissaanermi atortussiat Kalaallit Nunanni Nerisaqarnermut Siunnersuisoqatigiit nerisaqarnermut innersuussutaannut tulluarsagaapput, taassuma ataani kalaallit nerisassaataannik atuineq aammalu peqatigitillugu nunani avannarlerni inuussutissatigut innersuussutigineqartunut tulluarsagaallutik.
Peqataasut pikkorissaaneq pillugu ataatsimoorullugu naliliinerat pitsaasorujussuuvoq. Ilaatigut peqataasut namminneq nerisassat peqqinnartut pillugit annertunerusumik ilisimasaqalernertik aammalu najukkaminni nerisassat aamma nerisaqartitsineq pillugu politikkissamik suliaqarnerup qanoq aallartissinnaallugu ilisimasaqalernertik nalilerpaat.
Nerisaqarnermi Siunnersuisoqatigiit PAARISA-mi allattoqarfeqarput aammalu Innuttaasut peqqissuunissaannut pilersaarummi siunnersuisoqatigigiit qanittumik suleqatigalugit Inuunerittap neerisaqarneq aamma timimik aalatitsineq pillugit suliniutaanut peqataallutik. Nerisaqarnermut Siunnersuisoqatigiit pillugu annertunerusumik uani atuarsinnaavutit www.paarisa.gl aamma www.peqqik.gl
Paasissutissat annertunerusut pissarsiariniarlugit nakorsaq aamma Nerisaqarnermut Siunnersuisoqatigiit siulittaasuat Gert Mulvad, oqarasuaat +299 34 44 81 imaluunniit mobil +299 48 32 53 atorlugu attaveqarfigisinnaavat.