Ukioq manna atuaqatigiit pujortartuunngitsut toqqarneqarput
PAARISA-p atuaqatigiit pujortartuunngitsuni unammitsitsinerani Tasiilap Atuarfianeersut 5. x-mi atuartut ajugaapput.
Atuaqatigiit pujortartuunngitsutut taaguutip toqqagaassutiginerata saniatigut akissarsiarivaat 30.000 kruunit.
Atuaqatigiit 5. - 7. klassit tamarmik unammisitsinermi peqataasinnaasimapput. Unammisunut piumasaqaataasut ukuusimapput:
- Atuaqatigiit akornanni pujortartoqarsimappat, taakku pujortartartut unammitsitsinerup naammassinerani tamarmik pujortartarunnaarsimassapput.
- Pujortarunnaarsitsiniarlutik suliai nalunaarusiorneqassapput. Nalunaarusiornikkut allaaserineqassaaq qanoq iliorluni pujortarunnaarsitsiniaaneq ingerlanneqarnersoq.
- Pujortarunnaarsinneqartut uppernarsaassapput ilumut pujortarunnaarsimallutik. Taamaliorsinnaapput naatsumik pujortarunnaarnertik uppernarsarlugu allallutik imaluunniit assilitillutik atsiorlutillu imaluunniit naatsumik videomut immiutsillutik.
Tasiilap Alivarpiani 5. x-mi atuaqatigiit ajugaanerannut ukua tunngavilersuutigineqarput:
Atuaqatigiit pujortartartuunngillat, sulissuteqarsimapput pujortartartuunerup silarsuaata aammalu ulorianartortai misissuiffigisimavaat, aammali illoqarfimmi pujortartarunnaarniartunut ikiuinissaminnut iliuuserineqarsinnaasunik misissuisimallutik.
Atuaqatigiit ersarissumik allalluagaasumillu nalunaarusiorluarsimapput, imarisaa tigussaasumik iluserissumillu suliniutigisimasaminnik tigussaasumik ersersitsisuuvoq. Pujortarunnaarsitsiniarlutik suliniutigisimasaat avammut sammisuuvoq siamasissumillu atuaqatigiit iluminni ataqatigiissaarisimapput, ersaripporlu atuaqatigiit akornanni suliassanik agguaasseqatigiittoqarsimasoq. Nalunaarusiami suliniutilereriaatsimi aqutsineq ingerlatsinerlu malunnarluartumik periuutsitut atorsimavaat, atuarfimmilu akimorlugu ilinniartitsinermi inuiaqatigiilerineq, assassorneq inuttullu ineriartorneq akuutilluarneqarsimallutik.
Atuaqatigiit piareersarluarnermikkut atuarfimmi avatangiisitik peqataatilluarsimavaat, suliffeqarfiit, innuttaasut, angajoqqaat qatanngutillu peqataatinneqarluarsimallutik.
Ukioq manna klassit arfinillit unammisitsinermi piumasaqaataasut naammassisimavaat. Klassit 14-it unammeqataaniarlutik nalunaarsimagaluarput, klassilli arfiniliinnaat suliniutitik pillugit nalunaarusiaminnik nassitsisimallutik.
PAARISA upernaaru 2010-imi "Atuaqatigiit Pujortartanngitsut" pillugit unammisitseqqissaaq meeqqat atuarfiini atuartunut akullernut.
Annertunerusumik paasissutissanik piniartoqarsinaavoq ukununnga:
PAARISA, siunnersorti Sofie Jessen oqaras. 48 32 46 imaluunniit soj@gh.gl
Tasiilap Alivparia, ilinniartitsisoq Gitte Gelsted oqaras. 98 12 72 imaluunniit butgaard@hotmail.com