Sajuttunngorneq pillugu paasissutissiaq saqqummerpoq

PAARISA'p Qallunaat Nunaanni sajuttunngornermik nappaatillit peqatigiiffiat suleqati­galu­gu sajuttunngorneq pillugu kalaallisut paasissutissiaq saqqummersippaa. Paasissutissaq qulequtalik "Sajunnermik nappaateqalerneq sungiunniagassaavoq" sajunnermik nappaatilinnut, qanigisaasunut kiisalu kommunini sullissivinni peqqinnissaqarfimmilu sulisunut tun­ngatinneqarpoq.

Nappaat pillugu paasissutissanik siammarsaanissaq sajunnermillu nappaateqartut qanoq iliornikkut inuuneq eqeersimaarfiusoq naleqartitarlu attatiinnarsinnaagaat atuagaaqqiornermi siunertaavoq. Atuagaaraq nappaatip ersiutaanik, nappaammik suussusersiniaanermik, qanoq atugaatigineranik, sumik patsiseqarneranik, nakorsarneqartarneranik sungiusarnissamullu siunnersuutinik imaqarpoq.

Sajuttunngorneq qaratsakut nappaataavoq ajorsiartortartoq anigugassaanngitsorlu. Nap­paammut ersiutit nalinginnaasut tassaapput sajunneq, kigaallineq, nukiit eqarsinerat orloqqajaanerlu. Sianiutit nappaammik sunnerneqartut timip aalatissinnaaneranut nakkutilliisuunerat, nappaammut ersiutit taakku atuunnerannut patsisaavoq.

Nuna tamakkerlugu sajunnermik nappaatillit nunatsinni nalunaarsorneqarsimanngimmata amerlassusaat ilisimaneqanngilaq. Nuummi sajunnermik nappaatillit Dronning Ingridip Napparsimavissuani malittarineqartut quliupput.   

Sajunnermik nappaateqarneq pillugu atuagaaqqiaq decemberip qeqqani utoqqaat illuinut taamatullu kom­mu­nit peqqinnissaqarfiullu sullissiviutaannut agguaanneqassaaq, peqqinnissaqarfiullu nittartagaani: www.peqqik.gl-imi kiisalu PAARISA'p nittartagaani atuarneqarsinnaassalluni

Paasissutissat sukumiinerusut pissarsiariniaraanni:

Dronning Ingridip Napparsimavissuani nakorsartittunut immikkoortortaqarfimmi nakor­saaneq Folmer Lynggaard, e-mail: foly@peqqik.gl oqarasuaat: 344733.

Frederik Kristensen Kunngi: oqarasuaat: 323206 (sajunnermik nappaateqartoq) attavigineqarsinnaavortaaq.