Imminut toquttarnerup pitsaaliorneqarneranut TV-kkut takutitassiat naatsuaraliat
Pingaaruteqarpoq inuiaqatigiinni nukiit pingaarutillit tamarmik, inuunermi ajornartorsiutinut aaqqiissutitut imminut toqunnissamik inerniliutitut sakkugisannginnissaanik ersersitsinissaat. PAARISA Nanoq Film suleqatigalugu imminut toquttarnerup pitsaaliorneqarnissaanut TV-kkut takutitassianik aallakaatitassiorsimavoq.
Takutitassiarineqarput aallakaatitassiat assigiinngitsut naatsuaraliat qulingiluat, ilaatigut KNR-ikkut Nuuk TV-kkullu, kiisalu YouTube aamma inuit naapittarfiat Facebook aqqutigalugit takutinneqartartussat. Spotit takuniarukkit Facebook-ikkut imaluunniit YouTube-ikkut takusinnaavatit. Pingaarnertut avammut oqariartuutigineqarpoq imminut toquttarnerit unitsittariaqartut, uagullu tamatta imminut toqunnissanut pitsaaliueqataasinnaasugut. Inuuneq inuuffigiuk, qanorluunniillu ajornartorsiortigigaluaruit ikiortissaqarputit. Takutitassianut tamanut oqarasuaatikkut siunnersuisarfimmut Attavik 146-mut innersuussisumik allagartaliisoqartarpoq.
PAARISAp imminut toqunnerup pitsaaliorneqarnissaannik suliaqarnera WHO'p kaammattuutaanik ileqqorissaarnissamullu najoqqutassiaanik aallaaveqarpoq. Tamanna ima isumaqarpoq, imminut toqunnermik pitsaaliuineq inooqatigiinnermut tunngasutigut inoqatinillu pingaartitsinermut pisussaassuseqarfittut isigineqartoq, taamaasilluni imminut toqunneq inuunermi ajornartorsiornermi aaqqiissutitut isigineqannginniassammat. PAARISAp pitsaaliuinermi suliniutaani pingaarnerpaatut anguniagaasoq tassa imminut toquttut amerlassusiisa ikilisinneqarnissaat. Suliniummut tassunga aallaaviuvoq "Imminut toqunnissamik Pinaveersaartinneqarneranni Nuna Tamakkerlugu Periaasissatut Siunnersuut" 2004-meersoq, tassanilu siunnersuutinik pingaarutilinnik piviusunngortitsineq.
Ajoraluartumik nunatsinni siorna imminut toquttut 65-it nalaappavut. PAARISA uagut inuttut ajornartorsiutivut pillugit oqaloqatigiilluarnerusarnissatsinnik, aammalu inuit ajornartorsiortut kinaassuseq oqaatiginngikkaluarlugu oqarasuaatikkut akeqanngitsumik siunnersortinnissamut periarfissaqarnerannik oqariartuuteqarnissaminik suliniuteqarpoq. Oqariartuutit taakku TV-kkut takutitassiaaqqatigut qulingiluaasutigut tamanut apuusseqataassapput.
TV-kkut takutitassiaaqqat tamarmik immikkut 70 sek. miss. sivisussuseqarput - takutitassiarlu naatsunnguamik oqaasertaqarluni naggaserneqartarpoq: "Inuuneq inuuffigiuk - imminortarneq unitsilli - ikiorneqarnissat periarfissiguk" oqarasuaatikkullu siunnersuisarfimmut Attavik 146-mut ussassaarummik malitseqartarluni. Takutitassiat tamarmik oqaloqatigiinnertaqaratillu oqaluttortaqanngillat. Oqariartuutit Henrik Høyer Jensenip/Kishima-p erinniaanik nipilersuutitalerlugit takutinneqarput.
Takutitassiat ersersippaat imminut toqussimasoqartillugu annaasaqarneq qanoq artornartigisoq, kikkunnullu tamanut inuunerminni ajornartorsiutimik imminut toqunnikkut kipitinnissaannik eqqarsaateqalersinnaasunut saaffiginnittuupput. Allanik periarfissaqartoq takutitassiatigut tikkuarneqarpoq. Takutitassiornikkut anguniakkattaaq ilagaat qimagaasut qanorujussuaq maqaasisaqalernermik misigisaqartarnerannik takutitsiniarneq, kiisalu ikiortissaqartoq, ilaatigut Attavik 146-kkut. PAARISA neriuppoq takutitassiorneq paquminartorujussuartut suli maannamut isigineqartoq pillugu eqqarsalersitsissasoq oqallitsitsilissasorlu.
Annertunerusumik paasisaqarusukkuit PAARISA-mi siunnersorti Britta Nielsen Johansen attavigiuk oqarasuaammut +299 34 42 65-imut imaluunniit e-mail-ikkut bnj@peqqik.gl