Inuuneritta

Innuttaasut peqqissuunissaannik suliniut nutartigaq Inuuneritta II 2019-ip tungaanut atuuttussaq ukiup nutaap aallartinnerani atuutilersinneqassaaq. Peqqissutsitsinnut sunniuteqartut pingaarnersaat tassalu imigassaq, hashi, tupa, nerisat timillu atornissaa Inuuneritta II-mi qitiutinneqarput.

Inuuneritta II-mi sammineqartut sisamaasut innuttaasunut tamanut, pingaartumilli meeqqanut, inuusuttunut ilaqutariinnullu immikkut pisariaqartitsisutut toqqakkanut pingaaruteqarput.

Ilaqutariinni imigassamik hashimilllu atornerluiffiusuni peroriartornerup annertuunik kingunerluuteqartarnera, taama qitiutitsinermut patsisaavoq. Innuttaasut ilarpassui meeraanerminni inuusuttuaraanerminnilu tupatulersarput. Ileqqut peqqinnanngitsut taa-maattut kingusinnerusukkut nappaateqalernermut, toqujaarpallaarnermut, ukiunillu peqqilluni inuuffissaraluanik annaasaqarnermut patsisaasarmata, timip atornissaa peqqinnartunillu nerisaqarnissaq meeraanermiilli tunngavilerneqartariaqarput.

Inuuneritta II-p Nunatsinni innuttaasut peqqissuunissaat pillugu suliniummut Inuunerittamut siullermut taartaavoq. Suliniutit taakku marluk immikkoorutaat pingaarneq tassaavoq sammisat anguniagassatullu siunniussat erseqqisarneqarlutillu ikilisaavigineqangaatsiarnerat, taamatuttaaq suliniutinik ataqatigiissaarinerup patajaallisarnissaa pingaartinneqarpoq.

Inuunerittap iluani Inuuneritta Pulje nassaassaavoq, taassuma najukkani suliniutit pinaveersaartitsinermik peqqinnerulernissamillu siunertaqartut Inuunerittamilu anguniarneqartunut naapertuuttut taperserneqartarnissaat siunertaraa. 2006-imi novemberimi siullermeerluni agguaassisoqarpoq, tamatumalu kingorna ukiumut marloriarluni agguaassisoqartassaaq.

Uani atuaruk: www.peqqik.gl