Ilaqutariinnut naartusunut siusissukkut suliniuteqarneq
Ilaqutariinnut naartusunut siusissukkut suliniuteqarneq.
Suliniut "Ilaqutariinnut naartusunut siusissukkut suliniuteqarneq" Inuuneritta-p ataani suliniutigineqartussatut akuerineqarpoq, ilaqutariillu meerartaartussanngorneranniit meeqqap marlunnik ukioqalernissaa tikillugu malittarissallugu.
Suliniummi siunertarineqartoq tassaavoq najukkani peqqinnissaqarfinni ilaqutariinnut naartusunut suliniutaareersut ineriartortinnissaat aammalu katersorlugit ataqatigiiaarneqarnissaat, tamanna aqqutigalugu meeqqanik sumiginnaasarneq akiorniarlugu suliniutit annertusassallugit aammalu nukittorsassallugit.
Siunertarineqarpoq sulisorisat ilisimasatik akimorlugit aammalu angusassanik toraagaqarlutik naartusunik immikkut pisariaqartitsisunik nassaarsiornissaminnut aammalu ilaqutariinnut naartusunut naammattumik ikiorneqarnissaminnut neqeroorfigineqarnissaannut neqeroorutillu aallartinneqarnissaannut ataqatigiissaarisinnaanermut suliassamullu pilersaarusiorsinnaanissamut periusissaminnik neqeroorfigineqarnissaat. Taama ilisimasat akimorlugit iliuuseqarneq ilaqutariit naartusut qanittumik suleqatigalugit ingerlanneqassaaq aammalu taakku namminneq kissaatigisaat nukissaqassusiallu aallaavigineqassalluni.
Suliniummi sulisorisat nunaqavissut suliniummut pineqartumut peqataatinnissaat pikkorissarneqarnissaallu aallaaviuvoq. Suliniummi sulisorineqartussat pingaarnertut tassaassapput sammisamut attuumassuteqartut, soorlu juumuut, isumaginninnermi siunnersortit, tarnip pissusaanik ilisimasallit aammalu peqqissaasut. Kisiannili aamma najukkani assigiingitsuni sulisorisat allat immikkut ilisimasallit suliniummi isumalluutaassapput, tassa silittumik akimorluni suleqatigiinnerup suliassamut pilersaarusiat pineqartut aallartinneqarnissaannut periarfissat annertusassammatigit. Saniatigut aamma suliniummi sulisorineqartut Peqqissaanermik Ilinniarfimmit aaqqissuunneqartunik siunnersoqatigiittarnissaminnut immikkullu ilinniaqqinnissaminnut periarfissinneqartassapput.
Suliniut Nuummi ingerlanneqarlualereerpoq 2007-imilu majip naalernerani Aasianni aallartinneqarnissaa naatsorsuutigineqarpoq. Tamarmillu pitsaanerpaamik ingerlanneqariarpata aamma saniatigut september 2007 Qeqertarsuarmi Qasigiannguanilu suliniutip ingerlanneqalernissaa periarfissaassaaq.
Suli aamma 2010-p tungaanut najukkani peqqinnissaqarfiit ukiumut pingasut suliniummut peqataanissaminnut neqeroorfigineqartassapput.
Ulluinnarni suliniutip "Ilaqutariinnut naartusunut siusissukkut suliniuteqarneq"
ataqatigiissaarneqarnera aqunneqarneralu Peqqissaanermik Ilinniarfimmit Paarisa Peqqissutsimut Pisortaqarfimmiittoq suleqatigalugu ingerlanneqarpoq.
Paasissutissat annertunerusut - suliniummi ataqatigiissaarisoq Birgit Hansen, tlf. 34 99 54 imaluunniit e-mail biha@gh.gl atorlugu attaveqarfigiuk.