Sap. ak. 18

Sap.ak. 18 pillugu siunertaq

• Imigassartortarneq imigassartortarnermilu ileqqut qitiutinneqarnissaat
• Imigassartortarneq imigassartortarnermilu ileqqut pillugit oqallitsitsinermik pilersitsineq

Sap.ak. 18 pillugu najoqqutassaq

Sap.ak. 18-mi kommuunit, pinaveersaartitsinermut ataatsimiititaliat, atuarfiit, peqatigiiffiit, innuttaasut il.il. imigassartortarneq imigassartortarnermilu ileqqut qitiutillugit oqallitsitsinernik aallartitsisussanik sammisaqartitsinernillu imigassartaqanngitsunik aaqqissuinissaannik kaammattorneqarput. Kulturikkut misigisaqartitsinerit, nipilersorneq, erinarsorneq timersornerlu ataatsimoorussinermik , inuunermik nuannarinnilersitsisunik inuunermullu tunniusimanermik misigilersitsisut aaqqissuussinerni imaritinneqarnissaat kaammattuutigineqarpoq.

Oqallitsitsinernik aaqqissuussinernillu periarfissiinikkut sap.ak. 18 tamatumunnga tunniusseqataasinnaavoq, tassa  inuit imigassamik aserorsaasumik atuipilunneq pinnagu isummersulernissamut aammalu imminnut inuunermullu tunniusimassusermik peqalernissamut periarfissinneqassammata.

Sap.ak. 18 taama isikkoqarluni ukiuni pingasuni ingerlanneqassaaq, tamatuma kingorna taama isikkoqarluni ingerlaannassanersoq nalilersorneqassalluni.

Sap.ak. 18-mi sammisaq, ukiunik pingasunik sivisussusilik 2005 - 2007

Piffissami misiliiffimmi sap.ak. 18-mi sammisaq tassaassaaq Ilagisariinneq, qiimasunneq, kajuminneq.

Tassunga atatillugu "Ilaqutariit" tassaasinnaapput anaanaq, ataataq meeqqallu imaluunniit "ilaqutariit tamarmiusut", - soorlu aanaa, aataa, anga, aja, il.il.

Paarisamit siunnersorneqarsinnaaneq

Sap.ak. 18-mi sammitinneqartussat pillugit pinaveersaartitsinermut ataatsimiititaliat pitsaaliniermullu siunnersortit Paarisami siunnersortinik attavigineqarsinnaapput.

Sap.ak. 18-ip tunnuliaqutaa

Naalakkersuisut 1992-mi Inuuneq Nakuuneq aningaasaateqarfik pilersippaat ukiorlu taanna aamma Inuuneq Nakuunerup sap.ak. 18 pillugu isuma, tassa ukiut tamaasa nuna tamakkerlugu ilanngullugulu Kalaallit Nunaanni nammineq piumassuseqarneq naapertorlugu imigassartorfiunngitsutut ingerlanneqartartussatut saqqummersinneqarpoq. Sap.ak. 18-iunera 18-nik ukioqalernermi nammineersinnaassuseqalertarneq nassatarisaanillu nammineq inuunermut ilinniagaqarnissamut il.il. akisussaasuseqalertarnermik tunngaveqartinneqarpoq - taassuma ataani aamma imigassartortalissaneq qanorlu annertutigisumik imigassartortarlernissaq pillugu isummerneq.

Ukiut ingerlanerini imigassamik atuineq tunineqartoq liiterinngorlugu inummut ataatsimut naatsorsorlugu annikkilliartuaaginnarpoq.1992-miit ullumikkumut imigassamik atuinerup annikilliartornera assigiinngitsorpassuarnik tunngaveqarpoq, ilaatigut sap.ak. 18-p ingerlanneqartarneri peqqutinut ilaasutut nalilerneqarpoq.

Naalakkersuisut isumaqarput imigassamik atornerluineq killilersuinikkut inerteqquteqarnikkullu akiorneqassanngitsoq, kisiannili ataavartumik isummernernik ileqqunillu allanngortitsinikkut  tamanna  pissalluni.

Peqqinnissamik siuarsaanermut isiginninnermi nappaatinut, peqqinnissamut pinaveersaartitsinermullu tunngasut saqqumilaariartuinnarneranni sapaatip akunneranik imigassartorfiunngitsumik siunertaqarnissap pisariaarunnera ersersippaa. Imigassamik atornerluineq imigassartorlunilu aalakoortarneq Inuiaqatigiit peqqissusaannut naleqqiullugu suli unamminartuuvoq. Taamaattumik imigassartortarneq imigassartortarnermilu ileqqut qitiutillugit sammineqarnissaannut piffissanngorpoq.