Hashimik atornerluineq pillugu TV-kkut paasititsiniaaneq

Kalaallit Nunaanni hashimik atornerluinermut akiuiniarnermut iliuusissatut pilersaarutip ilaatut KNR-TV-mi Nuuk TV-milu aallakaatitassiaaqqat arfineq marluk takutinneqassapput. Siulleq januaarip ulluisa 24-anni takutinneqassaaq.

Hash aanngajaarniutillu allat pillugit oqallitsitsilernissaq taamatullu pinerluttaalisitsinermik sulinerup nukittorsaaqataaffigineqarnissaa paasititsiniaanermi anguniagaavoq. Angajoqqaat inersimasullu allat meeqqanut inuusuttunullu maligassiuisuupput paasititsi-niaanikkullu angajoqqaat aanngajaarniutinik atuineq pillugu meeqqaminnik oqaloqate-qarnissaannut tunngavissiisoqassaaq.

TV-kkut aallakaatitassiaaqqanik arfineq marluusunik takutitsinermi ingerlatitsisuussaaq Ivâna 15-inik ukiulik. Timersortartuuvoq pikkorissoq qiimasorlu, pikkorivissunut ilaalluni assammik arsaattartoq volleyballertartorlu. Ivâna ikinngutini, nalunngisani inuiaqatigiillu aqqutigalugit hashimik takutinneqakkajuttarpoq. Tamanna eqqumiigivaa namminerlu oqaatsini atorlugit nassuiaalluni paasititsiniaanikkut sammisaq misissorniarlugu. Taama iliussaaq inuit imminut isiginnaartartunullu paasissutissiilluarsinnaasut arlallit apersornerisigut.

Aallakaatitassiaaqqat tamarmik Ivânap sammisaq pillugu misigisaminik ilisimalikkaminil-lu oqaluttuarneranik naggaserneqartassapput. Aallakaatitassiaaqqat arfineq marluk taakku KNR-TV-mi innuttaasunut paasissutissiisarnerini Nuuk TV-llu nutaarsiassanik aallakaatitsinerata kinguninngua takutinneqartassapput. Aallakaatitassiaaraq ataaseq - sap.ak. ataaseq takutinneqartassaaq.

Imigassaq Ikiaroornartullu pillugit Siunnersuisoqatigiit paasititsiniaanerup Paarisamit isumagineqartup suliarineqarneranut peqataapput. Aallakaatitsinernut atatillugu innut-taasut Paarisamut paarisa@nanoq.gl -imut itisiliissutinik apeqquteqarsinnaatitaapput.

Aallakaatitassiaaqqat arfineq-marluk taakku uani quppernermi ingerlaavartumik ikkunneqartassapput.
 

Qulequttat tassaapput:
Aallakaatitassiaaraq 1: Hash Atuarfillu (24,4 MB)
Aallakaatitassiaaraq 2: Hash Kalaallit Nunaallu (27,1 MB)
Aallakaatitassiaaraq 3: Hash ilaquttallu (28,0 MB)
Aallakaatitassiaaraq 4: Hash inuunerlu (75,0 MB)
Aallakaatitassiaaraq 5: Hash siunissarlu (75,7 MB)
Aallakaatitassiaaraq 6: Hash peqqissuserlu (77,3 MB)
Aallakaatitassiaaraq 7: Hash - ajortumik toqqaaneruvoq!

Kalaallit Nunaanni hashimik atornerluineq silamik aallartitsisinnaasunik atuinernut allanut atasutut isigineqarlunilu naliliiffigineqassaaq, tassami inuit hashimik ajornartorsiuteqalersut amerlanersaat tupamik imigassamillu sivisunerusumik atuisuullutillu atornerluisuusarsimammata. Misissuinerni paasinarsisimavoq meeqqat inuusuttullu aamma hashimik pujortartartut meeqqanut inuusuttunullu isumaginninnikkut sullissiveqarfiit tarnimikkullu napparsimasunik isumaginniffiit malugeqquaat inuusuttoqarmat hashimik atornerluisorujussuarnik. Atornerluineq tamanna inuusuttut katsorsarneqarnerannut, ulluinnarni inuunerannut siunissaannullu kinguneqarsinnaavoq. 

Itinerusumik paasisaqarusunnermi saaffigisassaq: PAARISA-mi siunnersorti Berti Bourup oqarasuaat 346673 imal. e-mail berti@nanoq.gl