HIV aamma AIDS

Malunniutai

AIDS virusimit HIV-mit pisuuvoq. Virusip taassuma timitta nappaatinut akiuussinnaassusia ajoqusertarpaa. Taamaattumik AIDS-imut ilisarnaatit siulliit tassaagajupput timip bakterissanut, virusinut, svampinut tappiorannartunullu allanut akiuussinnaajunnaarneranut pisutaasut. HIV-mik tunillatsinnermiit ukiut arlalissuit ingerlasinnaapput AIDS-imik nappaateqalersimanermut malunnaatit saqqummernissaannut.

HIV-virus timimiileraangat tunillatsissimasut ilaat nualluttutut misigisimalersarput allanillu malunniutaasinnaasunik makkuninnga: anillattoorneq, sivisuumik qasoqqasarneq napparsimasutullu misigisimaneq, nassuaiarneqarsinnaanngitsumik sanigorneq, ikkiitigut annernartumik aseruuttoorneq, svampeqalerneq, qinersitigut tinusoorneq amermilu tinunerit kiisalu unnuami kiaguttarneq.

Malunniutaasinnaasunik allanik peqarpoq, aamma qulaani taaneqartut atugarigaanni tamanna isumaqartariaqanngilaq HIV-r-luni.

Tunillaattarnera

HIV atoqatigiinnikkut tunillaattarpoq. HIV aammi, anisuumi arnallu seerineraniittarpoq. Atoqatigiinnerup saniatigut tunillatsissimasup aavata allamut aalersuutigineqarneratigut virusi tunillaassinnaavoq.

Misissortinneq

Aassiortinnikkut HIV-qarneq takuneqarsinnaavoq. Tunillatsinnermiit qaammatit marlussuit qaangiunneranni HIV aassiortinnikkut takuneqarsinnaalersarpoq.

Katsorsarneqarnera

HIV-mut akiuussutissamik peqanngilaq, taamattuttaaq HIV-qarnerup kingunerisaanut toqussutaasartumut AIDS-imut akiuussutissaqarani. Iisartakkalli assigiinngitsut atornerisigut HIV-mik nappaateqartumi ¿uumasuaqqat¿ ikilisarneqarsinnaapput, taamaalilluni AIDS pinngitsoortissinnaallugu unitsilluguluunniit.

Nakorsaatitornerulli qanoq sivisutiginissaa qanorlu sivisutigisumik iluaqutaasinnaanera erseqqissumik oqaatigineqarsinnaanngilaq. Nakorsaatitorneq arlalinnik kingunerluuteqartarpoq, tamakkuli amerlanertigut qaangiuttarput. Nappaatit allat HIV-p aamma AIDS-ip ilaqutarisinnaasai amerlanertigut katsorsarneqarsinnaapput. Iisartakkat HIV/AIDS ajorunnaartissinnaanngilaat.

Katsorsarneqannginneq

HIV-mik tunillatsissimasut naartunaveersaarnissaannik inanneqartarput. Naartusup Hiv-mik nappaateqartup naartunermi nalaani erninerminilu meeraq tunillassinnaavaa.

HIV-virus katsorsarneqanngippat (takuuk malunnaatit) AIDS-innguulluni toqussutaasarpoq, timip imminut illersorsinnaanera ajorsisarmat nappaatinillu allanik, soorlu kræftimik allanillu inuunermik ulorianartorsiortitsisunik nappaateqalerneq toqussutaasarlutik.