Minipillit

Isumannaassusiat

Minipillit atorukkit naartulinnginnissat 98,5%-imik qulakkeerneqassaaq. Minipillit iisartagaapput hormonimik ataatsimik gestagenimik annikitsuinnarmik akullit. Arnap mannissaqarfianiit mannissaq qaammammut ataasiarluni kaanngartarpoq, mannissallu aqqutaati­goorluni illissamut ingerlasarluni. Minipillit atorukkit mannissaq illissamut nippussinnaanngilaq.

Minipillit kikkut atorsinnaavaat?

Minipillit arnanit tamangajannit atorneqarsinnaapput, arnanulli 30-t sinnerlugit ukiulinnut arnanullu milutsitsisunut atussallugit piukkunnarnerpaallutik. Arnanut inuusuttunut atussallugit piukkunnaateqannginnerulaarput.

Kinguaassiuutitigut nappaatit

Minipillit kinguaassiuutitigut nappaatinut tuniluuttartunut illersuutaanngillat. Kinguaassiuutiti­gut nappaatinik tunillatsikkusunngikkaanni usuup puua atoqatigiilernermi tamatigut aamma atortariaqarpoq.

Minipillit imatut sunniuttarput

Minipillit arnap timaani assigiinngitsumik sunniuteqartarput. Timip hormonii minipillit sunnertarpaat, illissap ameraasaa sunnertarlugu aammalu mannissap illissamut uninnissaa ajornakusoortilertarlugu. Illissap paani nigguusaq sunnerneqartarpoq anisuup uumasuaraasa illissamut iserniarnerat ajornakusoortunngortillugu. Minipillit ulluni 14-ini atoreerneranni illersuutaalersarput, taamaattumik ulluni taakkunani naartunaveersaat alla, soorlu usuup puua imaluunniit pessari innersuutigineqassaaq. Silatusaarneruvoq minipillit atulinnginneranni iisartakkat atornissaannut ilitsersuut atuassallugu.

Minipillit atulerniaraanni nakorsap peqataaffigisassai

• Nakorsap ilut misissoqqaassavaa.
• Aappit naqitsinera uuttortarneqassaaq oqimaalutarneqassaatillu.
• Ilaatigut qooq misissorneqartarpoq.
• Nakorsap aalajangissavaa ilinnut minipillit naleqquttuunersut. Iisartakkat ilinnut naleqquppata napparsimmavimmit/peqqissaavimmit imaluunniit nunaqarfimmi nakorsiartarfimmit tunniunneqassapput.
• Minipillit qaammatit pingasut atoreernerini nakorsamut misissorteqqissaatit, tassani paasiniarneqassalluni iisartakkat timinnut qanoq sunniuteqarsimanersut. Ilaatigut misissorne­qassapput aappit naqitsinera, oqimaassutsit immaqalu aamma quut misissorlugu.
• Silatusaarneruvoq ukiumut ataasiarluni nakorsamit misissortittarnissaq.

Minipillit pitsaaqutaat

• Minipillit hormonimik østrogenimik akoqanngillat.

Minipillit akornutaat

Minipillit ullut tamaasa piffissaq aalajangersimasoq eqqorlugu iineqartartussaapput. Aaqartarnitit akuttoqatigiikkunnaarsinnaapput. Ilaatigut aaqanngitsoortoqarsinnaasarpoq, imaluunniit aaqalaaqattaarsinnaavutit ingammik qaammatini siullerni marlunni pingasuni. Timmittaruit meriartaruilluunniit naartunaveersaatip illersuutaanera annikinnerussaaq, timmikkunnaareernerullu imaluunniit meriartarunnaareernerup kingorna ulluni siullerni allamik illersuuteqartoqartariaqarpoq.Arnat ataasiakkaat minipillinik iisartagartornermikkut nikallungaqqajaa­laalersinnaasarput.