tekststørrelseindkøbskurv
Allaffigitigut• Ikinngutinnut ingerlateqqiguk
 

Pessari

Isumannaassusia

Pessari eqqortumik atorukku naartulinnginnissat 97% tikillugu qulakkeerneqassaaq.

 

Pessari gummimik sanaajuvoq, aammalortuulluni sinaa kaajallallugu qituttumik saviminertalik. Angissutsit assigiinngitsut pigineqarput. Naartulinnginnissamut pingaaruteqarpoq pessarip ilinnut tulluulluinnarnissaa, aammalu tamatigut tarnutissap atorneqartarnissaa, taanna anisuup uumasuaraanik toqutsisarmat.

 

Kinguaassiuutitigut nappaatit

Kinguaassiuutitigut nappaatinut tuniluuttartunut pessari illersuutaanngilaq. Kinguaassiuutitigut nappaatinut tuniluuttartunut illersorniaraanni usuup puua atortariaqarpoq.

 

Pessaritaarniarnermi nakorsap peqataaffigissavai

  • Ilup misissornerani nakorsap pessarip angissusissaa ilinnut naammalluinnartussanngor­lugu uuttortassavaa.
  • Nakorsap pessaritaareernerpit kingorna sapaatip akunnera qaangiuppat nakorsiaqqeq­qussavaatit, pessari eqqortumik ikkussinnaanerit paasiniarlugu.
  • Pessari ukiumut ataasiarluni taarserneqassaaq gummip aqiliortarnera pissutiga­lugu.
  • Ilut uuttorneqaqqissaaq ernereernerup, naartuersereernerup imaluunniit ilukkut pilatsereernerup kingorna.

Pessari imatut sunniuttarpoq

Pessarip illissap paava milittarpaa anisuup uumasuarai illissap iluanut isersinnaajunnaarsillugit. Pessari aamma tarnut atoqatigiilernerit tamaasa atorneqartassaaq. Pessarip atornissaa nalunaaquttap akunneri marluk sioqqullugit ikkunneqarsinnaavoq, atoqatigeereernermilu pessari sivikinnerpaamik nal. akunneri 6-t atatiinnar­neqassalluni, pitsaanerpaajuvorli nalunaaquttap akunnerini 8-ni atatinneqaruni.

 

Pessarip pitsaaqutai

  • Pessari arnat amerlanersaannit atorneqarsinnaavoq. Pessari illersuutaavoq pisariitsoq mannissap kaanngarnissaanut timillu hormoneqar­neranut sunniuteqanngitsoq.
  • Pessari iluamik ikkusimatillugu atoqatigiinnerup nalaani aapparisavit malugisinnaanngilaa.
  • Nakorsamit misissortittariaqarnerit amerlanngillat.
  • Aaqaleqqaarnermi aaqarunnaalernermilu atorneqarsinnaavoq.

Pessarip akornutai

Pessari atoqatigiilinnginnermi ikkutassaavoq. Tulleriinnik arlaleriarluni atoqatigiissagaanni tarnut atoqattaartariaqarpoq.

Pessarimut tarnut qasilititsilaarsinnaavoq.