MIPI Inuuneritta suleqatigalugu nalunaarusiamik tamanut saqqummiussivoq

MIPI Inuuneritta suleqatigalugu nalunaarusiamik meeqqat peqqissusiannut tunngasumik imaqartinneqartumik saqqummersitsivoq: Inuuneritta - Innuttaasut peqqissuunissaannik suliniut aallaavigalugu meeqqat peqqissusiat inooqatigiinnikkut isigalugu.

Nalunaarusiap imarisai:

Meeqqat inuusuttullu pillugit nalunaarsuutit piusut ataqatigiissillugit aaqqissuunneqarnerisigut, Nuummi, illoqarfinni anginerni, illoqarfinni minnerni aammalu avinngarusimasuni najugaqaraanni meeqqat inuusuttullu peqqissusiisa assigiingitsuunerat takutinneqarpoq. Immikkoortuni arlariinni nunaqarfinni avinngarusimasunilu meeqqat peqqissutsikkut oqimaatsorsiornerupput.

Aamma nunaqarfiit avinngarusimasullu aningaasarsiornikkut piitsuunerpaapput, aammalu nunaqarfinni avinngarusimasunilu innuttaasunut naleqqiukkaanni meeqqat amerlanerupput. Ilutigitillugu nunaqarfinni innuttaasut illoqarfinni, Nuup illoqarfiani nunaqarfinnilu najugalinnut naleqqiullutik amerlanerusut pilersorneqalerumaarnissaat ilimagineqarpoq. Nunaqarfiit avinngarusimasullu aamma tassaammata peqqinnisaqarfimmit angujuminaannerpaat, meeqqat akornanni inooqatigiinnermi peqqissutsikkut assigiinngissutsit takutinneqartut annikillisinneqassappata, assigiinngitsorpassuartigut inuiaqatigiit tungaanniit ataqaatigiissaakkamik suliniuteqarnissaq pisariaqarpoq.

Nalunaarusiami meeqqat peqqissusiat pillugu inerniliinerit Inuuneritta - Innuttaasut peqqissuunissaannut suliniummi meeqqat inuusuttullu peqqissusiannut anguniarneqartunut imikkoortiterneqarnikuupput. Sammisat tassaapput: kinguaassiuutitigut peqqissuuneq, akornusernerit kamaassinerit aamma qinngasaarisarneq, nerisarisat aamma nerisarnermi ileqqut, imigassaq aamma pujortartarneq, timimik aalatitsineq aamma aalatitsisannginneq, piaartumik iluuseqarneq, kigutit peqqissuunerat taassumalu ataani meeqqat inuusuttullu isumalluutaat nalunaarusiami isiginiarneqarput.

Inerniliinerit ilaat:

• Kommuninut angisuunut, peqataasut amerlanerpaaffiinnut naartusut 91,8%-inut naleqqiullugu kommunini avinngarusimasuni naartusut innersuussutigineqartutut juumuumit imaluunniit peqqissaasunit allanit misissortissimasut ikinnerupput (69,0%).
• Nuup illoqarfianut, illoqarfinnut nunaqarfinnullu tunngatillugu amerlanerusut ingasanngitsumik timiminnik aalatitsisarnerat, ikinnerusullu sapaatip akunneranut akunnerit 4 imaluunniit taakku sinnerlugit timigisartarnerat imaluunniit timersortarnerat takuneqarpoq. Akerlianilli illoqarfinni annikitsuararsuarmik timersortartut amerlanerpaapput.
• 15-inik ukiullit ullut tamaasa pujortartartut ersarivissumik Nuummi ikinnerpaapput (21,3%) nunaqarfinnilu akulikinnerullutik, taakkunani 38,3%-it ullut tamaasa pujortartarput. 15-inik ukiullit marloriarlutik imaluunniit arlaleriarlutik aalakoorsimasut nunaqarfinni ikinnerpaapput Nuullu illoqarfiani amerlanerpaallutik.
• Nuummut, illoqarfinnut nunaqarfinnullu tunngatillugu meeqqat nunaqarfinni najugaqartut (22,1%) angerlarsimaffimmi nerisassanik amigaateqarneq misigisarpaat, ilutigitilluguli nunaqarfinni meeqqat akulikinnerusumik ullut tamaasa mamakujuttunik sodavandinillu atuisarput (53,8%) akuttunerusumillu paarnartortalutik. Nuup illoqarfianut assersuukkaanni nunaqarfinni meeqqat amerlanerujussuit (38,4%) sapaatip akunneranut ataasiarlutik imaluunniit arlaleriarlutik puisip imaluunniit arferup neqaanik nerisarput.

Paasissutissat annertunerusut:

Doktor i Folkesundhed / nalunaarusiamik allattoq Birgit V. L. Niclasen oqarasuaat 52 38 32 aamma e-mail: bivn@gh.gl

MIPI-mi immikkortumi ataqatigiissaarisuugallartoq Lona Lynge oqarasuaat 34 69 40 aamma e-mail: loly@gh.gl

Inuuneritta-mi siunnersorti Jakku Bregnhøj oqarasuaat 34 66 61 aamma e-mail: jabr@gh.gl

Kisea Bruun, MIPI-mi siulittaasoq oqarasuaat 36 21 06 aamma e-mail: kisb@kanukoka.gl

Saqqummersinneqartoq uannga download-erneqarsinnaavoq www.mipi.gl